吐露

 在 分隊消息, 吐露分隊

今年巡迴賽仍然由吐露打响頭炮。汲取去年八月微風下勉強作賽嘅經驗,今年提早在六月一、二日舉行。星期六嘅招牌西南風及星期日令人驚喜嘅西風實在不負眾望,可惜有部份青年軍、賽手要應付學校考試未能出席比賽。
由於吐露嘅西南風要借助太陽伯伯嘅熱力,第一日賽事要延遲至大概正午十二時半才開始,風勢在幾分鐘內由1-2浬增至6浬以上。在起步綫等候已久嘅賽手高興之餘,賽事主管亦立刻把握機會連賽三場,考考賽手及工作人員嘅能耐。有人中暑,有人要揾汽水補充糖分,岸上家長就如熱煱上的螞蟻,一方面擔心小朋友餓壞、缺水、缺糖、體能應付不來。另一方面天氣實在太熱,賽手及工作人員則忙於應付比賽,盡快完成嘅誘因可能唔係成績而係岸上嘅凍飲同飯盒……。三時許賽手們終於陸續回岸收拾,及品嚐期待已久嘅凍飲同太陽能保温飯盒。

第二日一早就吹着10浬以上嘅西風,令賽手們非常振奮。西風由洋洲方向吹向水壩,即係話一落水就夠風開賽,唔需要花時間出去油台、馬屎洲,可以來個速戰速決。十點正準時開賽,最後一個起步都只不過係十一時十九分,本以為順利十二時前完成所有賽事,奈何二十分鐘後海面突然變成定鏡背景,只見未完成嘅賽手們不斷搖帆,有部份就仍然喺上風泡徘徊……。

總結本站賽事大至完滿,感謝賽事管理、各義務工作人員及賽手成全賽事。下一站屯門就要等到八月中啦!